కరాచీ: తమ టీమ్లో పదిమంది క్రికెటర్లు కరోనా బారిన పడ్డారని పాకిస్తాన్ క్రికెట్ బోర్డు (పీసీబీ) ప్రకటించిన మరుసటి రోజే ఆల్రౌండర్ మహ్మద్ హఫీజ్ తనకు కరోనా లేదని ప్రకటించాడు. తనతో పాటు కుటుంబ సభ్యులెవరూ ఈ వైరస్ బారిన పడలేదని వెల్లడించాడు. ‘పీసీబీ చెప్పిన విషయాన్ని మరోసారి ధ్రువీకరించుకునేందుకు నేను వ్యక్తిగతంగా టెస్ట్ చేయించుకున్నా. కుటుంబసభ్యులకు కూడా. దేవుడి దయతో నాకు, నా కుటుంబానికి వైరస్ సోకలేదు. అన్ని పరీక్షల ఫలితాలు నెగెటివ్గా వచ్చాయి. అల్లానే మా అందర్ని కాపాడాడు. ప్రతిఒక్కరూ సురక్షితంగా ఉండాలి’ అని హఫీజ్ ట్వీట్ చేశాడు. కరోనా నుంచి బయటపడిన హఫీజ్.. మరి ఇంగ్లండ్ పర్యటనకు వెళ్తాడో లేదో తెలియదు.
