న్యూఢిల్లీ: కరోనా నేపథ్యంలో టీ20 ప్రపంచ కప్ను వాయిదా వేస్తారని ఊహాగానాలు వచ్చినా.. అంతర్జాతీయ క్రికెట్ కమిటీ (ఐసీసీ) ఆ దిశగా అడుగులు వేయలేకపోయింది. ప్రస్తుత పరిణామాలను నిశితంగా గమనిస్తున్న గవర్నింగ్ బాడీ తమ నిర్ణయాన్ని వచ్చేనెల 10కు వాయిదా వేసింది. అప్పటివరకు పరిస్థితులపై భాగస్వాములతో చర్చించాలని నిర్ణయించింది. ఆ తర్వాతే మెగాఈవెంట్స్పై తుదినిర్ణయం తీసుకోనుంది. మూడు రోజుల పాటు జరిగిన వీడియో కాన్ఫరెన్స్లో సుదీర్ఘమైన చర్చలు జరిగినా తమ షెడ్యూల్స్కు సంబంధించి ఐసీసీ ఎటూ తేల్చుకోలేకపోయింది. అయితే గవర్నింగ్ బాడీకి సంబంధించిన రహస్య విషయాలు మీడియాకు లీక్ కావడంపై తీవ్ర ఆందోళన వ్యక్తంచేసిన ఐసీసీ.. దీనిపై విచారణకు ఆదేశించింది.
రహస్యంగా ఉండాల్సిన ఈ మెయిల్స్, ఇతర అంశాలు ఎలా లీక్ అవుతున్నాయో కనిపెట్టాలని ఎథిక్స్ ఆఫీసర్ను ఆదేశించింది. ‘పరిపాలనలో అత్యుత్తమ ప్రమాణాలు పాటిస్తున్నా.. సమాచారం లీక్ కావడంపై బోర్డులో ఎక్కువ మంది సభ్యులు ఆందోళన చెందుతున్నారు. తమకు తెలియకముందే మీడియాకు సమాచారం ఎలా లీక్ అవుతుందో తేల్చాలని కోరారు. మా ఎథిక్స్ ఆఫీసర్ ఈ లీక్‌లపై సమగ్ర విచారణ జరిపిస్తారు. ప్రపంచవ్యాప్తంగా ఉండే నిపుణులు కూడా ఇందుకు సహకరిస్తారు. వచ్చే సమావేశంలో దీనికి సంబంధించిన అంశాలను సీఈవో మీకు వెల్లడిస్తారు’ అని ఐసీసీ పేర్కొంది.
