న్యూఢిల్లీ: ఓవైపు కరోనా భయపెడుతున్నా.. మరోవైపు ఇంగ్లండ్, ఆస్ట్రేలియా, వెస్టిండీస్, శ్రీలంక క్రికెటర్లు ట్రైనింగ్ మొదలుపెట్టారు. కానీ టీమిండియా మాత్రం ఈ విషయంలో ఇంకా వెనకడుగు వేస్తూనే ఉంది. మరి భారత క్రికెటర్లు ట్రైనింగ్ ఎప్పుడు మొదలుపెడతారన్న దానిపై బీసీసీఐ కోశాధికారి అరుణ్ ధుమాల్ కొద్దిగా స్పష్టత ఇచ్చాడు. క్రికెటర్ల ప్రాక్టీస్కు సంబంధించి జాతీయ క్రికెట్ అకాడమీ (ఎన్సీఏ), క్రికెట్ ఆపరేషన్స్ టీమ్ ప్రణాళికలు సిద్ధం చేస్తోందన్నాడు. ‘ఇప్పుడు మా ముందున్న లక్ష్యం.. క్రికెట్ను మొదలుపెట్టడం. ఇందుకు అవసరమైన చర్యలు తీసుకుంటున్నాం.
ఆటగాళ్ల ప్రాక్టీస్పై ఇప్పటికే రెండు టీమ్లు కసరత్తులు చేస్తోంది. లాక్ డౌన్ సడలింపుల విషయంలో చాలా రాష్ట్రాల్లో చాలా తేడాలు ఉన్నాయి. వీటన్నింటిని మేం పరిగణనలోకి తీసుకుని షెడ్యూల్ను రూపొందించాలి. అందుకే నిర్ధిష్ట సమయాన్ని చెప్పలేకపోతున్నాం. వీలైనంత త్వరగా ట్రైనింగ్ మొదలుపెట్టేందుకు శాయశక్తులా కృషి చేస్తాం’ అని ధుమాల్ పేర్కొన్నాడు. జాతీయ క్యాంప్ కోసం తాము ఏదో ఓ ప్రదేశాన్ని ఎంచుకోవాల్సి ఉందన్నాడు.
