- 100 మంది క్వారంటైన్‌లోకి
భోపాల్‌: పెళ్లయిన కొద్ది గంటలకే ఆ జంట క్వారంటైన్‌లోకి వెళ్లిపోవాల్సి వచ్చింది. పెండ్లి కొచ్చిన చుట్టాల్లో ఒకరికి కరోనా పాజిటివ్‌ రావడంతో కొత్త జంటతో సహా వందమంది అధికారులు క్వారంటైన్‌లోకి పంపించారు. మధ్యప్రదేశ్‌లోని ఛింద్వారా జిల్లాలో మంగళవారం ఈ విషయం వెలుగుచూసింది. సెంట్రల్‌ ఇండస్ట్రియల్‌ సెక్యూరిటీ ఫోర్స్‌ (సీఐఎస్‌ఎఫ్‌)లో ఉద్యోగం చేస్తున్న వధువు బంధువు గతవారం ఛింద్వారా జిల్లాలోని జున్నార్దియోలో ఉన్న ఇంటికి వెళ్లారు.
ఆ వ్యక్తి ఈ నెల 26న తన మరదలు పెళ్లికి హాజరయ్యాడు. అతనికి కరోనా లక్షణాలు కనిపించడంతో పరీక్షలు చేసిన అధికారులు వైరస్‌ సోకినట్లు మంగళవారం నిర్ధారణకు వచ్చారు. ఈ నేపథ్యంలో అతడిని కలిసిన ప్రైమరీ కాంటాక్ట్స్‌ను గుర్తిస్తున్నామని, వధూవరులతో సహా పెళ్లికి వచ్చిన వంద మందిని క్వారంటైన్‌ కేంద్రాలకు తరలించామని కలెక్టర్‌ సౌరభ్‌ సుమన్‌ చెప్పారు. అతనిపై చట్టరీత్యా చర్యలు తీసుకుంటామన్నారు.
