సారథి న్యూస్, రామగుండం: తెలంగాణ రాష్ట్రంలో సీఎం కేసీఆర్ ప్రభుత్వం నిరుద్యోగ యువతను మోసం చేస్తూ పబ్బం గడుపుతోందని అఖిల భారత యువజన సమాఖ్య(ఏఐవైఎఫ్) పెద్దపల్లి జిల్లా కన్వీనర్ ఆర్.మానస కుమార్ అన్నారు. ఈ మేరకు బుధవారం ఏఐవైఎఫ్ ఆధ్వర్యంలో తెలంగాణ తల్లి విగ్రహానికి వినతిపత్రం ఇస్తూ నిరసన తెలిపారు. ఈ సందర్భంగా ఆయన మాట్లాడుతూ.. రాష్ట్రంలో మూడు లక్షల ఉద్యోగాలు ఖాళీగా ఉన్నాయని తెలిపారు. నిరుద్యోగ భృతి ఇస్తామని ఎన్నికల ముందు మాయమాటలు చెప్పి యువత ఓట్లను దండుకున్నారని అన్నారు. ఉద్యోగుల భర్తీకి నోటిఫికేషన్లు విడుదల చేయాలని ఆయన డిమాండ్ చేశారు. లేనిపక్షంలో యువజన ఉద్యమాలను ఉధృతం చేస్తామని హెచ్చరించారు. కార్యక్రమంలో ఏఐవైఎఫ్ నగర ప్రధాన కార్యదర్శి శ్రీకాంత్, జిల్లా కోకన్వీనర్ విజయ్, సురేందర్, రేణిగుంట ప్రీతమ్, బలరాం, దేవేందర్, జె.మల్లేష్, రమేష్, శ్యామ్ పాల్గొన్నారు.
