సామాజికసారథి, ఫీచర్స్ డెస్క్: జానపద సాహిత్యం జీవితమంత విశాలమైనది. వెస్ట్రన్, పాప్ మ్యూజిక్ సంగీత ప్రపంచాన్ని ముంచెత్తుతున్న తరుణంలో కమ్మనైన బాణీలతో పల్లె పదానికి కొత్త సొబగులు అద్దుతున్నారు ఈ గాయకులు. ఆ పాటలు వింటుంటే గుండెకు హత్తుకుంటుంది. ఒక్కసారిగా పల్లె స్మృతులు, బావమరదళ్ల సరసాలు, పిచ్చుకగూళ్లు, సెలయేర్లు, కొబ్బరి తోటలు.. ఇవన్నీ గుర్తుకొస్తుంటాయి. అలాంటి జ్ఞాపకాలను మోసుకొచ్చే ఓ సాంగ్ ఇప్పుడు యూ ట్యూబ్ ను షేక్ చేస్తోంది. DJSHIVA music ఛానెల్ రూపొందించిన ‘‘ నెమలి కన్నుల దానివే ఓ పిల్లా నెలవంక తీరున్నావే ఈ వేళ..!, సెలయేరు పారుతుంటే ఓ పిల్లా ఎదగోళ్లు ఉండే లోలోన.. నదులన్నీ కలిసినట్టు నవ్వెంతో బాగున్నది ఈ వేళ’’ అంటూ సాగే ఈ యుగళగీతం అలసిపోయిన మనస్సులను పరవశింపజేస్తున్నది. సరళమైన భాష, శ్రావ్యమైన సంగీతం, వినసొంపైన బాణీలు, అంతకంటే ఆహ్లాదమైన ప్రకృతి రమణీయతతో పులకరింపజేస్తోంది. మహేందర్ ముల్కాల రాశారు. కళ్యాణ్ సంగీతం సమకూర్చగా, డీకే శివ వంగూరు, శ్రీనిధి శ్రావ్యమైన గొంతుతో ఆలపించారు. ఇప్పటికే 17,025,278 మంది విన్నారు. ఇంకెందుకు ఆలస్యం మీరూ వినేయండి.. హాయిగా..!
