మాడ్రిడ్: కీలక సమయంలో కళ్లు తిరిగే పెనాల్టీ కార్నర్తో గోల్ సాధించినా.. ప్రత్యర్థి ఆటగాళ్లను అడ్డుకోలేకపోయిన ఎఫ్సీ బార్సిలోనా.. లా లిగా టోర్నీలో మూడో డ్రాతో సంతృప్తి పడింది. దీంతో అట్లెటికో మాడ్రిడ్తో జరిగిన ఫుట్బాల్ లీగ్ మ్యాచ్ను 2–2తో డ్రాగా ముగించింది. బార్సిలోనా తరఫున డియాగో కోస్టా(11వ ని.), లియోనల్ మెస్సీ(50వ ని.) గోల్స్ చేయగా, సాల్ నిగుయెజ్ (19, 62వ ని.) అట్టెటికోకు గోల్స్ అందించాడు. ప్రస్తుతం రియల్ మాడ్రిడ్ 32 మ్యాచ్ల్లో 71 పాయింట్లతో టాప్లో కొనసాగుతుండగా, ఎఫ్సీ బార్సిలోనా 33 మ్యాచ్ల్లో 70 పాయింట్లతో రెండో స్థానంలో ఉంది.
అట్లెటికో మాడ్రిడ్ 33 మ్యాచ్లో 59 పాయింట్లతో మూడో స్థానాన్ని దక్కించుకుంది. సెవిల్లా ఎఫ్సీ (57), గెలాఫీ (52) తర్వాతి స్థానాల్లో ఉన్నాయి. లీగ్ దశలో ఆడిన నాలుగు మ్యాచ్లో మూడో డ్రా చేసుకున్న బార్సిలోనా, ఒకే ఒక్క మ్యాచ్లో నెగ్గింది. తొలి క్వార్టర్ 11వ నిమిషంలో మెస్సీ కొట్టిన కార్నర్ కిక్కు సూపర్ ఫినిష్ ఇచ్చిన కోస్టా ఓన్ గోల్ సాధించాడు. దీంతో బార్సిలోనా 1–0 ఆధిక్యంలోకి వెళ్లింది. సరిగ్గా ఎనిమిది నిమిషాల తర్వాత సాల్ నిగుయెజ్ కొట్టిన పెనాల్టీ కార్నర్ బార్సిలోనా గోల్ పోస్ట్లోకి దూసుకుపోవడంతో ఇరుజట్ల స్కోరు సమమైంది. మ్యాచ్ 50వ నిమిషంలో రెనాన్ లోడి అందించిన పాస్ను డ్రిబ్లింగ్ చేసిన మెస్సీ కర్లింగ్ కిక్ కొట్టడంతో బాల్ నేరుగా అట్లెటికో గోల్ పోస్ట్ను ఛేదించింది. మెస్సీ కెరీర్లో ఇది 700వ గోల్ కావడం విశేషం. సాల్ నిగుయెజ్ కొట్టిన కార్నర్ కిక్.. బార్సిలోనా ప్లేయర్ టెర్ స్టాజెన్ చేతితో అడ్డుకోవడంతో అట్లెటికోకు రెండో పెనాల్టీ కార్నర్ లభించింది. ఈ అవకాశాన్ని సాల్ నిగుయెజ్ గోల్గా మలిచి స్కోరు మరోసారి సమం చేశాడు.
700 క్లబ్లో మెస్సీ
అర్జెంటీనా స్టార్ స్ట్రయికర్, బార్సిలోనా టాప్ ప్లేయర్ మెస్సీ 700 గోల్స్ క్లబ్లో చోటు సంపాదించాడు. దీంతో ఈ ఘనత సాధించిన రెండో ఫుట్బాలర్గా రికార్డుల్లోకి ఎక్కాడు. క్లబ్ ఫుట్బాల్లో 630 గోల్స్ చేసిన మెస్సీ.. అర్జెంటీనా తరఫున అంతర్జాతీయ స్థాయిలో 70 గోల్స్ సాధించాడు. 856 మ్యాచ్ల్లో మెస్సీ ఈ ఫీట్ను సాధించాడు. జువెంటాస్, పోర్చుగల్ స్టార్ క్రిస్టియానో రొనాల్డో(725) టాప్లో ఉన్నాడు. ఓవరాల్గా వెయ్యి మ్యాచ్లు ఆడిన రొనాల్డో క్లబ్ స్థాయిలో 626 గోల్స్ సాధించాడు.
