వయసు పెరుగుతున్నా వన్నె తరగలేదు టాలీవుడ్ చందమామ కాజల్ అగర్వాల్కు. గ్లామర్, అభినయం రెండూ పెనవేసుకున్న నటిగా తెలుగు వారి గుండెల్లో తిష్ట వేసుకుని కూర్చున్న ఈ కుందనపు బొమ్మ ఇప్పుడు కొత్త పలుకులు పలుకుతోంది. ఎప్పుడూ షూటింగ్ లో బిజీగా ఉండే తనకి ఈ లాక్ డౌన్ చాలా కొత్త సంగతులను నేర్పిందట. రెండు నెలలుగా ఇంట్లోనే ఉంటున్న కాజల్ ముందు ఫిట్ నెస్పై శ్రద్ధపెట్టింది. అది కాస్తా బోర్ కొట్టిందేమో ఇంటర్నేషనల్ గేమ్ చెస్ ఆడడం మొదలు పెట్టిందిట. ఆడటమే కాదు ఆ ఆటపై పట్టు సాధించాలని.. అన్ని వెబ్ సైట్లను వెతికి చదరంగంలో మెళకువలన్నీ నేర్చుకుందట. ఆ తర్వాతేమో మనసును ఆధ్యాత్మికత వైపు మళ్లించిందట.
ఇక దూరదర్శన్లో ప్రసారమవుతున్న భారత, రామాయణాన్ని చూడడమే కాదు భాగవతాన్ని కూడా ఫాలో అయిందట. భగవద్గీతలోని శ్లోకాలు కూడా కొన్ని నేర్చుకుందట.. ఇప్పుడు తన మనసు ప్రశాంతంగా ఉందట. ఇలా తన విలువైన టైమ్ను గడిపిన కాజల్ లాక్ డౌన్ అనంతరం షూటింగ్లకు హాజరుకానుంది. ప్రస్తుతం కాజల్ శంకర్ దర్శకత్వంలో రూపొందుతున్న ‘భారతీయుడు 2’, కొరటాల శివ దర్శకత్వంలో తెరకెక్కుతున్న ‘ఆచార్య’ సినిమాల్లో నటిస్తోంది.
