సారథి న్యూస్, నాగర్ కర్నూల్: లాక్ డౌన్ నేపథ్యంలో జిల్లాలో ఉండిపోయిన వలస కార్మికులు, విద్యార్థులను వారివారి స్వస్థలాలకు తరలించేందుకు నోడల్ ఆఫీసర్లుగా అఖిలేష్ రెడ్డి, అనిల్ ప్రకాష్ ను నియమించినట్లు నాగర్ కర్నూల్ జిల్లా కలెక్టర్ శ్రీధర్ శుక్రవారం తెలిపారు. వలస కార్మికుల కోసం అంతర్రాష్ట్ర ప్రయాణాలకు అనుమతినిస్తున్నట్లు కేంద్ర, రాష్ట్ర ప్రభుత్వాలు ప్రకటించాయని, అందుకు జిల్లాస్థాయిలో నోడల్ అధికారులను నియమించామని పేర్కొన్నారు.
మండలాల వారీగా కలెక్టరేట్లో వివరాలను ఆయా నోడల్ ఆఫీసర్లు సేకరించారన్నారు. జిల్లాలో 6,660 మంది వలస కార్మికులు ఉన్నారని ప్రకటించారు. ఇతర ప్రాంత విద్యార్థులు, సొంత వాహనాలు కలిగినవారు మండల తహసీల్దార్లను కలిసి పాస్ లు పొందొచ్చని, లేనివారు మాత్రం నోడల్ ఆఫీసర్లను సంప్రదిస్తే రాష్ట్రస్థాయి అధికారులతో మాట్లాడి ఏర్పాట్లు చేస్తారని కలెక్టర్ స్పష్టంచేశారు.
